ಟೆಲ್ ಅವಿವ್: ತಮ್ಮ ಸಾವಿನ ಕುರಿತು ಹರಿದಾಡುತ್ತಿದ್ದ ವದಂತಿಗಳಿಗೆ ಇಸ್ರೇಲ್ ಪ್ರಧಾನಿ Benjamin Netanyahu ಸ್ಪಷ್ಟನೆ ನೀಡಿದ್ದು, “ನೀವೆಲ್ಲರೂ ನೋಡುತ್ತಿದ್ದಂತೆ ನಾನು ಜೀವಂತವಾಗಿದ್ದೇನೆ” ಎಂದು ಪ್ರತಿಕ್ರಿಯಿಸಿದ್ದಾರೆ.
ಇರಾನ್ ವಿರುದ್ಧ ನಡೆಯುತ್ತಿರುವ ಯುದ್ಧದ ಹಿನ್ನೆಲೆ ವಿಡಿಯೋ ಸಂದೇಶ ನೀಡಿದ ಅವರು, ತಮ್ಮ ಸರ್ಕಾರದ ಮೂರು ಪ್ರಮುಖ ಗುರಿಗಳನ್ನು ವಿವರಿಸಿದರು. ಮೊದಲನೆಯದಾಗಿ, Iran ನ ಪರಮಾಣು ಬೆದರಿಕೆಯನ್ನು ನಿರ್ಮೂಲನೆ ಮಾಡುವುದು, ಎರಡನೆಯದಾಗಿ ಬ್ಯಾಲಿಸ್ಟಿಕ್ ಕ್ಷಿಪಣಿ ಬೆದರಿಕೆಯನ್ನು ಕಡಿಮೆ ಮಾಡುವುದು ಮತ್ತು ಮೂರನೆಯದಾಗಿ ಇರಾನ್ ಜನರಿಗೆ ಸ್ವಾತಂತ್ರ್ಯ ಪಡೆಯಲು ನೆರವಾಗುವುದು ಎಂದು ಹೇಳಿದರು.
ತಮ್ಮ ಸಾವಿನ ಕುರಿತು ಹರಿದಾಡುತ್ತಿದ್ದ ವದಂತಿಗಳನ್ನು ತಳ್ಳಿ ಹಾಕಿದ ಅವರು, “ನಾನು ಜೀವಂತವಾಗಿರುವುದಕ್ಕೆ ನೀವು ಸಾಕ್ಷಿ” ಎಂದು ವಿದೇಶಿ ಮಾಧ್ಯಮಗಳಿಗೆ ಇಂಗ್ಲಿಷ್ನಲ್ಲಿ ಉತ್ತರಿಸಿದ್ದಾರೆ.
ಇನ್ನಷ್ಟು ಮಾತನಾಡಿದ ಅವರು, ಇರಾನ್ ಯುರೇನಿಯಂ ಉತ್ಕೃಷ್ಟಗೊಳಿಸುವ ಹಾಗೂ ಬ್ಯಾಲಿಸ್ಟಿಕ್ ಕ್ಷಿಪಣಿ ತಯಾರಿಸುವ ಸಾಮರ್ಥ್ಯವನ್ನು ಕುಗ್ಗಿಸಲಾಗಿದೆ ಎಂದು ಹೇಳಿದ್ದಾರೆ. ಈ ಕಾರ್ಯಾಚರಣೆ ಇರಾನ್ನಿಂದ ಉಂಟಾಗುವ ಅಸ್ತಿತ್ವದ ಬೆದರಿಕೆಯನ್ನು ನಿವಾರಿಸಲು ಕೈಗೊಳ್ಳಲಾಗಿದೆ ಎಂದರು.
ಅದೇ ವೇಳೆ, ಈ ಸಂಘರ್ಷದಲ್ಲಿ United States ನ್ನು ಎಳೆದುಕೊಂಡು ಬಂದಿದ್ದಾರೆ ಎಂಬ ಆರೋಪಗಳನ್ನು ಅವರು ತಳ್ಳಿಹಾಕಿದರು. ಅಮೆರಿಕಾ ಅಧ್ಯಕ್ಷ Donald Trump ಕುರಿತು ಉಲ್ಲೇಖಿಸಿ, “ಯಾರಾದರೂ ಟ್ರಂಪ್ ಅವರಿಗೆ ಏನು ಮಾಡಬೇಕೆಂದು ಹೇಳಲು ಸಾಧ್ಯವೇ? ಅವರು ಯಾವತ್ತೂ ಅಮೆರಿಕದ ಹಿತಕ್ಕಾಗಿ ಕೆಲಸ ಮಾಡುತ್ತಾರೆ” ಎಂದು ಹೇಳಿದರು.
ಒಟ್ಟಾರೆ, ನೆತನ್ಯಾಹು ಅವರ ಈ ಹೇಳಿಕೆಗಳು ಮಧ್ಯಪ್ರಾಚ್ಯದಲ್ಲಿನ ಉದ್ವಿಗ್ನತೆಯ ನಡುವೆ ಹೊಸ ಚರ್ಚೆಗೆ ಕಾರಣವಾಗಿವೆ.
