ಬೆಂಗಳೂರು: ವಿಜಯಪುರ ಜಿಲ್ಲೆಯ ಬಸವಣ್ಣನ ಹುಟ್ಟೂರು ಬಸವನಬಾಗೇವಾಡಿ ತಾಲೂಕಿನಲ್ಲಿ 3.5 ತೀವ್ರತೆಯ ಭೂಕಂಪ ಉಂಟಾಗಿರುವುದಾಗಿ ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ಮೇಲ್ವಿಚಾರಣಾ ಕೇಂದ್ರದ ಅಧಿಕೃತ ವೆಬ್ಸೈಟ್ನಲ್ಲಿ ದಾಖಲಿಸಿದೆ.
ಮಧ್ಯರಾತ್ರಿ 12:26:12ರ ಹೊತ್ತಿಗೆ ಭೂಕಂಪನ ಸಂಭವಿಸಿದ್ದು, ಅದರ ಕೇಂದ್ರಬಿಂದುವು ಬಸವನ ಬಾಗೇವಾಡಿ ತಾಲೂಕಿನ ದಿಂಡವಾರ ಗ್ರಾಮ ಪಂಚಾಯಿತಿಯಿಂದ ನೈಋತ್ಯಕ್ಕೆ 1.1 ಕಿ.ಮೀ ದೂರದಲ್ಲಿ ಸಂಧಿಸಿದ್ದು, ಈ ನಿರ್ದಿಷ್ಟ ಸ್ಥಳವು ಅಕ್ಷಾಂಶ 16.650ಲಿ ಉತ್ತರ ಮತ್ತು ರೇಖಾಂಶ 76.045ಲಿ ಪೂರ್ವದಲ್ಲಿದೆ. ಭೂಗರ್ಭದಲ್ಲಿ ಅಥವಾ ಸಮುದ್ರದ ಮೇಲ್ಮೈಯಿಂದ ಈ ಸ್ಥಳದ ಆಳವು 10 ಕಿಲೋಮೀಟರ್ ಆಗಿರುವುದಾಗಿ ದಾಖಲಿಸಲಾಗಿದೆ.
ಕೇಂದ್ರಬಿಂದುವಿನಿಂದ ಇತರ ಪ್ರಮುಖ ಸ್ಥಳಗಳ ದೂರ ಹೀಗಿದೆ: ವಿಜಯಪುರ ಜಿಲ್ಲೆಯ ಬಸವನ ಬಾಗೇವಾಡಿ ತಾಲೂಕಿನ ದಿಂಡವಾರ ಗ್ರಾಮ ಪಂಚಾಯಿತಿಯಿಂದ ನೈಋತ್ಯಕ್ಕೆ 1.1 ಕಿ.ಮೀ. ಕೇಂದ್ರಬಿಂದುವನ್ನು ಹೊಂದಿರುವ ಈ ಭೂಕಂಪವು ಇಂಗಳೇಶ್ವರ ಗ್ರಾಮ ಪಂಚಾಯಿತಿಯಿಂದ ಪೂರ್ವ-ಆಗ್ನೇಯಕ್ಕೆ 3.0 ಕಿ.ಮೀ., ರಬಿನಾಳ ಗ್ರಾಮದಿಂದ ದಕ್ಷಿಣ-ನೈಋತ್ಯಕ್ಕೆ 5.3 ಕಿ.ಮೀ., ಕಮನ್ಕೇರಿ ಗ್ರಾಮದಿಂದ ಪಶ್ಚಿಮಕ್ಕೆ (W) 5.5 ಕಿ.ಮೀ., ಬಸವನ ಬಾಗೇವಾಡಿ ತಾಲೂಕು ಕೇಂದ್ರದಿಂದ ಈಶಾನ್ಯಕ್ಕೆ 11.5 ಕಿ.ಮೀ. ಹಾಗೂ ವಿಜಯಪುರ ನಗರದಿಂದ ನೈಋತ್ಯಕ್ಕೆ 40.0 ಕಿ.ಮೀ.ವರೆಗೆ ಭೂಕಂಪನ ಕೇಂದ್ರಬಿಂದು ಸಂಧಿಸಿದೆ.
ಭೂಕಂಪ ತೀವ್ರತೆಯ ನಕ್ಷೆಯ ಪ್ರಕಾರ ಗಮನಿಸಲಾದ ತೀವ್ರತೆ ಕಡಿಮೆಯಾಗಿದ್ದು, ಕೇಂದ್ರಬಿಂದುವಿನಿಂದ 50-60 ಕಿ.ಮೀ. ತ್ರಿಜ್ಯದ ವ್ಯಾಪ್ತಿಯವರೆಗೆ ಭೂಕಂಪನ ಅನುಭವ ಉಂಟಾಗಬಹುದು. ತೀವ್ರತೆ ಕಡಿಮೆಯಿರುವುದರಿಂದ ಈ ಭೂಕಂಪ ಸ್ಥಳೀಯವಾಗಿ ಯಾವುದೇ ರೀತಿಯ ಹಾನಿ ಉಂಟುಮಾಡುವುದಿಲ್ಲ. ಆದರೂ ಸ್ಥಳೀಯವಾಗಿ ಭೂಕಂಪನಗಳ ಅನುಭವ ಉಂಟಾಗಬಹುದು. ಕೇಂದ್ರಬಿಂದು ಭೂಕಂಪನ ವಲಯ-III ವ್ಯಾಪ್ತಿಗೆ ಬರುತ್ತದೆ ಮತ್ತು ಟೆಕ್ಟೋನಿಕ್ ನಕ್ಷೆಯ ಪ್ರಕಾರ ಈ ಪ್ರದೇಶದಲ್ಲಿ ಯಾವುದೇ ರಚನಾತ್ಮಕ ಅಸಂಗತತೆಗಳು ಕಂಡುಬಂದಿಲ್ಲ. ದಾಖಲಾದ ಭೂಕಂಪನ ತೀವ್ರತೆ ಮತ್ತು ಪ್ರಮಾಣ ಎರಡೂ ಕಡಿಮೆಯಿರುವುದರಿಂದ ಸಾರ್ವಜನಿಕರು ಆತಂಕಪಡುವ ಅಗತ್ಯವಿಲ್ಲ ಎಂದು ಕೆ.ಎಸ್.ಎನ್.ಡಿ.ಎಂ.ಸಿ ನಿರ್ದೇಶಕರು ತಿಳಿಸಿದ್ದಾರೆ.
